ჯანმრთელ სკაში თითქმის იდეალური სტერილობა სუფევს. სკა ფუტკრისთვის ყველაფერია: სამშობიაროც, ბაგა–ბაღიც და ძალზე სერიოზული ქიმიურ–ბიოლოგიური ფაბრიკაც. ლაბორატორიული სისუფთავის დაცვაში უმნიშვნელოვანესი როლი  პროპოლისს –  უძვირფასეს და უნიკალურ პროდუქტს ენიჭება.

უმაღლესი ტექნოლოგიები

როგორც წესი, ყველაზე ხნიერი ფუტკრები მცენარეებიდან ( ვერხვი, ფიჭვი, წაბლი, ურთხმელი, ტირიფი, არყის და ალვის ხეების კვირტებისგან, ახალგაზრდა რტოებისა და ფოთლებისგან) წებოვან ნივთიერებებს აგროვებენ და შეგროვილს დასამუშავებლად ახალგაზრდა ფუტკრებს გადასცემენ, რადგან ისინი სკაში უკვე აღარ შედიან.  ახალგაზრდა ფუტკრები, სანერწყვე ჯირკვლებში გამომუშავებული სეკრეტით, უნიკალური ფერმენტებითა და რაღაც ჯერ კიდევ უცნობი ნივთიერებებით ამდიდრებენ. გარდა ამისა, პროპოლისი ცვილსა და ყვავილის მტვერსაც შეიცავს.

თავისი ბაქტერიოციდული მოქმედებით, პროპოლისი  ფუტკრის ოჯახს მოსალოდნელი საფრთხისგან იცავს. საფრთხეები შეიძლება იყოს; მიკრობები, ბაქტერიები, სოკოები, თაგვები და პეპლები. მნიშვნელოვანია რომ, მიკროორგანიზმებს პროპოლისისადმი რეზისტენტობა არ უჩნდებათ.

ცოტაოდენი ქიმია

არომატული და სასიამოვნო გემოს მქონე პროპოლისი, ჯერ კიდევ ყველაზე გამოცდილი მეცნიერებისთვისაც გამოცანად რჩება.  ქიმიური შემადგენლობით ის ძალიან რთულია და  მცენარეების ტიპებზეა დამოკიდებული. ცნობილია, რომ პროპოლისი  კუპრისებრ მჟავებს და სპირტებს, არტეპილინს, ფენოლს, ბალზამებს, ცვილს, ფლავონოიდებს, ამინომჟავებს და B ჯგუფის ვიტამინებს შეიცავს. თუმცა, მასში  აღმოჩენილი 284 ნაერთიდან, მხოლოდ 111–ია იდენტიფიცირებული.

​